【小一面試班】每年呢個時候，小一面試正式開鑼，唔少直資、私立小學開始接受申請。有入媽媽谷嘅家長，一定畀唔少面試班嘅資訊轟炸。其實我都理解，香港大部分父母都希望自己細路在教育起跑線上就算不是贏，至少不會輸太多⋯⋯呢類新聞睇咗好多年，依家殺到埋身，作為一個「負責任」的爸爸，到底應該點樣負呢個責任？我的態度是：No！
小孩太細 面試班有無必要？
我有一對仔女，大仔五歲，細女兩歲，我哋呢班新手家長，十足十盲頭烏蠅，但竟然要我哋班幾歲人仔嘅小寶貝咁細個就要開始學點樣面對大世界。佢哋連鞋帶都未識綁，我哋就期望佢哋喺面試官面前表現得完美無瑕，係咪好笑呢？
其實我都有過徬徨嘅時候，大仔兩歲嘅時候，我有幫佢報面試班。老師教佢坐定定、聽指令，仲要學識離座要拉好張櫈、靈巧地運用食指姆指搣貼紙⋯⋯成班細路train到一式一樣。
其實諗返有時覺得我哋大人真係好得意，將自己嘅焦慮同競爭心態投射喺啲細路身上，好似佢哋入唔到名校就會一世唔成功咁。但我認為，細路其實更加需要嘅係時間去發現世界，去感受陽光同微風，而唔係坐喺教室裡面學點樣做個小小面試機械人。
面試班對孩子有多大幫助？
試想像一下，如果我哋唔係將時間同錢花喺面試班上面，而係用嚟同啲細路一齊玩、學習同成長，咁嘅話會有幾好。細路嘅笑聲同快樂，先至係我哋真正應該追求嘅，而唔係啲虛榮嘅標籤同名校嘅錄取通知書。
所以啦，放低啲唔切實際嘅期望啦，唔好再將壓力加喺啲細路身上。我深信佢哋嘅快樂同健康成長，遠比一封錄取通知書重要多咗。相信我，當啲細路喺一個充滿愛同支持嘅環境下成長，佢哋自然會搵到屬於自己嘅道路，而我哋嘅任務，就係畀佢哋最大嘅支持同鼓勵，讓啲細路快樂成長，咁先係我哋做父母最應該做嘅事。係咪呀？
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
