聽日(6月5日)又係小一放榜大日子，今年我無份，以為可以輕輕鬆鬆安坐家中，開部電視睇下邊啲家長入到名校開心到跳起，又或者派入寶校崩潰到喊。點知突然收到死黨訊息 ：「Eric，星期三請一日假，車我叩門！」呢個死黨識咗廿幾三十年，點會托手踭。但應承咗之後就背脊一涼，弊！佢老婆係緊張大師，今次真係大件事。
果然不出我所料，做車手唔係揸車咁簡單，死黨星期日向我求救，急call我去佢屋企開會。去到真係哇一聲，電視畫面顯示緊香港地圖，成枱都係叩門文件。死黨老婆就開始講Plan A、Plan B、Plan C⋯⋯簡單講就係漁翁撒網，最壞打算係要去20間學校叩門！聽到我同死黨下巴都跌咗落地。
忌貪心 宜鎖定5學校叩門
作為獲得老婆認證嘅神隊友，呢個時候我要爆喇！我叫阿嫂坐低飲啖茶，聽聽我呢個過來人講講叩門宜忌。去到打大佬階段，其實最重要係阿仔表現，唔好話20間，假設10間學校都安排面試，阿仔會攰，家長會亂，表現成點你可以想像到。我識一個校長話我聽，試過面試時家長求位求到喊，令到小朋友好驚，你話學校會唔會收？
我嘅意見係，放榜前只需要搵最心儀嘅津校，再加上有申請過嘅直資或私校，鎖定大約5間左右就夠，一來面試時間無咁易撞，阿仔唔使成日趕下場，表現都會好啲，家長亦可以對每間學校有充足準備。
跨區叩門機會增
有個小貼士，家長不妨跨區叩門，因為有時同區校長會有共識，盡量唔會搶學生，變相跨區學生機會大咗。至於好多家長糾結學校係咪111先會面見，坦白講以前係，但近年出生率下降，而家只有少數地區名校堅持。計我話，有心水嘅學校，唔理三七廿一試咗先。不過要留意，如果你有直資或私校offer仍去津校叩門，一定要講到背後原因，例如本身係津校校友、搬屋之類，令人覺得你真係有心嚟讀，唔係玩大包圍。而心儀直資學校亦可以搏一搏，如果學校無開放申請，記得準備自薦信、推薦信。
所以秘訣係三個字：夠誠意！
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
