內容目錄
【手足口病】為人父母最怕就係仔女病。政府成日提醒而家係咩病咩病高峰期，但我已經麻木，因為每日都係高峰期。
點解我咁灰？因為細女係「疫情BB」，出世到而家成日傷風感冒發燒，免疫力比較弱。而家佢兩歲返playgroup，大家可以想像到小朋友攬頭攬頸，口水和鼻涕到處都係，你都唔會覺得驚訝。所以我一直要佢上堂戴口罩。
手足口病會傳染嗎？
不過世上最難防嘅始終係細菌。阿女琴日放學返嚟開始發燒，今日去睇醫生，醫生檢查阿女口腔發現有幾粒痱滋，幾肯定佢係手足口病。但醫生話手足口病無特效藥，只可以食退燒藥紓緩。
原來踏入5月，就係手足口病高峰期，主要透過飛沫同糞便傳播，可能會手腳起水泡或口腔潰爛。聽到咁恐怖，我即刻問媽媽谷點處理，一問之下嚇死我！有媽媽講返佢個仔生咗30粒痱滋，乜都食唔到，仲要傳埋俾哥哥，兩兄弟病完足足輕咗幾磅！
仔女患手足口病 家長心掛掛？
講返阿女，夜晚檢查有10幾粒痱滋，個人無晒心機，見到心都痛埋。基本上熱嘢、要用力吞吞嘅食物佢都耍手擰頭，惟有俾佢食粥、飲湯，仲有佢至愛嘅雪糕、布甸，總算有食物落肚。
好彩過咗幾日，阿女痱滋退晒，又生猛返肯食飯。但過咗一個月，阿女手指開始出現脫甲，我又擔心阿女係咪缺乏某種維他命？上網一查就發現原來手足口病期間，腸病毒感染令指甲生長板暫時停止生長，因為甲床開始生長大約需時1至2個月，所以通常腸病毒好返3至8週後發生脱甲症，只要小心護理，靜候新甲生長就可。
一次手足口，真係搞到我暈陀陀。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
