最近有網民喺社交平台分享一名小三妹妹嘅「暑假時間表」，時間表詳細地規劃從早上9點到下午5點的生活日程，包括做功課、睇書、背單詞，當中仲包括埋「看大自然、去廁所、刷牙、看手機和下午茶」等，引起谷友熱烈討論。Eric爸爸都有睇到，碰啱有朋友同我討論假期功課嘅問題，令我反思對小朋友暑假或假期嘅生活安排。
「假期無功課怕養懶小朋友」
呢位朋友兩年前一家三口已經移民去英國，今個暑假回港探親，約咗我哋敍下舊。其間，呢個朋友同我講佢讀小六個仔喺英國讀書嘅點滴，當中佢「投訴」英國學校功課少得可憐，平時一個星期只得一樣半樣功課，長假期仲幾乎無功課，只需要按學校建議閱讀幾本書，但沒有交任何閱讀報告之類嘅任務，佢話好擔心養懶阿仔，第時學業追唔上⋯⋯
Eric爸爸聽完之後，直接問呢位朋友個仔鍾唔鍾意喺英國讀書，想唔想返香港讀書？佢聽咗之後話完全唔想返香港讀書，原因係香港學校日日都好多功課要做，放學又要去補習，日日攰到喊，而英國好少功課，多咗好多時間玩同休息，所以勁鍾意喺英國讀書，想返香港唯一原因就係食嘢！
小朋友變健康開朗好動
我再問返呢位朋友有冇留意佢個仔嘅變化，佢承認見到阿仔比喺香港時笑多咗、面色好咗，仲多嘢講咗，連以前唔鍾意運動，依家仲參加埋地區足球隊，成日嗌住話要去公園踢波，不過就係擔心升中學時追唔上學習云云。
我同朋友講唔使擔心咁多，個仔開心咗、健康咗，已經有賺啦！我認為假期就係假期，唔應該仲要為學習憂心，反而應該安排多些學習以外嘅活動，等佢哋趁機會開闊眼界。英國嘅學校唔畀功課一定有佢原因，唔好自尋煩惱。你睇英國教育舉世聞名，雲集世界頂尖學校和學府，如果佢哋套教育方法唔掂又點樣訓練出咁多尖子、名人或政要？
凡事莫強求 別忘身心健康
有個似呢位小三妹妹咁自律嘅小朋友當然值得高興(如果真係佢自願又實行到），但凡事毋須強求，我一向認為小朋友嘅成長，唔應該側重喺學業，小朋友身心健康同樣重要，甚至係最重要，呢個都係我反對幫阿仔阿女揀嗰啲谷小朋友學業谷到鼻血都出埋嘅所謂名校嘅原因。老套但都嗰句，平衡發展實在好緊要，共勉之。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
