香港中學文憑試（DSE）日前放榜，又係有人歡笑有人愁嘅時間，例牌新聞人物當然係一班新鮮出爐嘅狀元，但最吸引Eric爸爸視線嘅，係芸芸考生之中竟然包括一名9歲小學生，而且仲攞到5**成績。
9歲小學生考DSE摘5**
呢位小考生叫梁智仁，以9歲之齡越級挑戰DSE數學必修部分及延伸部分單元二，分別考獲5*及5**成績。據報道，仁仔只係用半年時間學習DSE範圍及操練試卷就攞到爆燈成績，仲話若以1至10分為試卷難度評分，今屆兩科數學試卷對佢嚟講只有1分難度。
香港都算係盛產數學神童嘅福地，翻查資料，近嘅有去年喺英國GCE A-Level憑3A*及1A佳績，獲牛津大學取錄修讀數學系嘅15歲港產尖子楊子進；3年前又有13歲就成為城市大學最年輕的學生，修讀工學士智能製造工程課程嘅江誥綸，據報佢兩歲半已識念乘數表，5歲就識雙位數乘法，中小學共5次跳級，智商獲評150。
印象最深鬼馬沈詩鈞
而Eric爸爸最深印象嘅，一定係記者會上不停整鬼整馬和頻舉V字手勢影相嘅沈詩鈞，佢當年(2007年)都係9歲，但已經喺英國GCE A-Level 嘅高考數學及進階數學獲A級、統計學獲B級，因而獲浸大數學系破格取錄，成為香港歷來最年輕大學生，到18歲已出任美國加州大學洛杉磯分校客席助理教授，依家係美國密歇根州立大學數學系助理教授。
睇到呢幾篇報道，Eric爸爸真心覺得佢哋好勁之餘，想起自己當年數學科嘅表現就有啲汗顏。
當眾大鬧激起鬥志
我從小對數學無天份又無興趣，小學仲應付到，上到中學就每下愈况。記得中二嗰年，逢測驗都唔及格，有次低至得20分，老師當住全班同學面前話我「不知所謂」，我聽咗之後好似被人摑咗一巴咁，唔衰得嘅性格令我之後狂做數學練習，結果下一次測驗有七十幾分，連老師都好意外，仲當眾表揚我，話大家要向我學習添！自此，我對數學開始有啲興趣，成績漸漸進步，雖然唔係好標青，但都有中上成績。
可能好多家長都好羨慕呢幾位神童嘅爸爸媽媽，有個咁叻嘅小朋友真係光宗耀祖。但Eric 爸爸覺得唔使羨慕，一來神童天注定，可遇不可求：二來小朋友各有強弱項，唔好淨係睇學業成績，應該發掘同欣賞佢哋唔同方面嘅長處，老套講句就係因材施教，小朋友身心先至可以健康成長。
鬧完要讚免失信心
好長氣，但都要講多句，Eric爸爸對公開指摘小孩其實頗為反感，覺得咁樣可能會令佢哋自尊心受損，因為唔係每個小朋友都好似我咁內心強大(即係面皮夠厚)，所以，不論老師好、家長好，真係要鬧都要睇人、方式、場合同時間，亂咁鬧隨時適得其反，愈閙愈差。我嘅做法就係鬧完要讚，鬧可以令小朋友知道自己問題所在，讚可以畀動力和信心佢去改進，唔知各位家長又點睇呢？
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
