書展2024將於7月17至23日舉行，好多家長已經睇定有咩優惠，諗定要買咩書，希望打造一個愛閱讀嘅孩子。但就算買到間屋變咗圖書館，有幾多個家庭培養到愛閱讀嘅小朋友？咁究竟點樣令孩子真正愛上閱讀呢？我要講講自己嘅𤓓爆經歷。
幼稚園舉辦故事爸媽活動
話說大仔一兩歲開始，我奉老婆大人之命每晚同阿仔親子閱讀，諗返起嚟場面都好溫馨。到大仔讀幼稚園，學校邀請家長返學校講故事，以我多年親子閱讀經驗梗係無問題，easy job！
嗰日朝早，我一早嚟到學校禮堂坐低，先發現原來現場仲有四、五個父母。各位家長坐喺不同角落，小朋友可以自己揀去邊度聽故事。正當我跟足故事書一句一句讀畀小朋友聽，點知眼前五、六個小朋友無反應不得止，仲陸續離開，突然之間我面前無晒人！我四圍望望，發現遠處一個角落逼滿小朋友，行近見到有個爸爸講故事講到七情上面，適當嘅時候又會停一停問小朋友問題，啲小朋友笑到卡卡聲。而我發現其中一個係我個仔，佢望住人哋爸爸雙眼閃閃發光，呢個表情我係從未見過。
無比較無傷害，今次我被徹底擊敗，個心穿咗個窿。我千辛萬苦喺媽媽谷搵到呢個神級故事爸爸，把握機會請教佢，爸爸話佢最初其實都唔識講故事，唯有睇書睇片學，佢推介由美國教育心理學家Grover J. Whitehurst提出嘅CROWD理論，我發現又幾容易幾work喎！
CROWD互動閱讀法
CROWD 理論其實是一種互動閱讀的方法，以下係5個要素：
1. Completion (完整句子)：
畀孩子一個唔完整句子，等佢哋完成，例如《三隻小豬》，當讀到「狼出盡氣力向第一隻豬嘅稻草屋吹啊吹」，你可以停低問：你覺得跟住會發生咩事？
2. Recall (回憶內容)：
讀完一個故事後，可以問孩子故事情節，幫佢哋回憶並加深印象，例如讀完《白雪公主》後，你可以問：你仲記得白雪公主遇到幾多個小矮人？佢哋係點樣幫白雪公主？
3. Open-ended questions (開放性問題)：
問一啲無標準答案嘅問題，鼓勵小朋友發揮想像力同表達能力，例如讀《哈利波特》時，你可以問：如果你都可以進入霍格華茲，你最想學邊種魔法？
4. Wh- questions (5個W問題)：
問一啲包含 who/what/where/when/why嘅問題，幫助孩子理解故事基本要素，例如讀《愛麗絲夢遊仙境》時，你可以問：愛麗絲係咩時候跌入兔子洞？佢喺洞裏面遇到邊個？
5. Distancing (拉近距離)：
將故事內容同孩子的真實生活聯繫起來，等佢更有共鳴，例如讀完《彼得兔》後，你可以問：你有沒有好似彼得兔一樣，做過一啲頑皮嘅事呢？當時係咩情況？
我應用咗呢個理論之後，發現伴讀時阿仔好有反應，我覺得應用喺幼稚園小朋友身上，非常有效。大家都係第一次做父母，有好多嘢會覺得我細個咪又咁咁咁，使乜學？但呢個年代養育一個小朋友，真係好多學問。有時唔好怪小朋友唔鍾意睇書，反而問下自己，係咪成日喺小朋友面前玩手機呢？
Eric爸爸
80後兩孩爸爸，被譽為「神隊友」，最鍾意同大家交流仔女經。
