一年容易又「放榜」！近日各個親子教育谷最熱爆話題之一肯定係下星期三（6月5號)統一派位公布結果，身邊有讀緊K3嘅家長朋友，近日車輪轉咁call我，想我呢個過來人教下路，當中佢哋最想知嘅就係「萬一」派唔到心儀小學嘅叩門攻略。
家長全方位備戰 隨時出動叩門
其實佢哋唔係唔知叩門要預備咩嘢，佢哋搵我，我覺得主要係取經為名，減壓為實！想番起3年前，我個大仔小一派位嘅日子就好似六合彩開獎咁。當時因為之前自行分配階段只得「校友分」，所以唔成功，唯有寄望大抽獎。結果？幸運之神冇選中我哋，41校網最後派咗跨區第8志願。我同老婆當時灰到爆，冇得揀，焗住叩門！當時我哋帶住5歲嘅人仔左飛右撲，烈日當空排長龍等面試的情境好似琴日發生嘅事一樣！
準備不足手忙腳亂全軍盡墨
鬼咩，都係自己衰，無諗過派到第8選擇咁差，所以我哋除咗整咗份profo ，幾乎一啲叩門準備都冇，手忙腳亂咁周圍去碰運氣。但係僧多粥少，成功嘅機會我哋都心裏有數，大約有10間學校遞咗表，結果有兩三間回覆可以參加筆試或面試，但最後都係全軍盡墨！
心情跌到谷底之餘，老婆忽然靈光一閃，話之前聽過有成功個案係直接搵校長「求位」，於是就逼迫返晩間工作嘅我日日早上出動，當時揀咗幾間學校，晨早就仆去學校大門口，搏下校長早上在校門「迎賓」時傾幾句。
血脈相連發揮神奇作用
血脈嘅嘢有時唔到你唔信係有某種無形嘅關連，雖然唔係乜嘢blue blood，但喺呢個關鍵嘅時刻發揮咗作用。講到咁神奇，究竟係乜嘢呢？
話說前後花咗差唔多兩個禮拜，日日似返工咁準時現身其中一間目標學校，食咗唔少白果同檸檬做早餐之後，最後都有機會接觸到幾位校長，但大都是寒喧兩句就沒有下文，唯獨是小弟嘅母校，有機會同校長打咗兩三次招呼，畀佢認得我個嘜頭之後，終於有次膽粗粗問校長有冇時間傾幾句，校長好爽快答應，以為只會企喺門口交流交流下，點知被邀請上樓去校長室傾。
日日捱眼瞓 朝朝學校「返工」
受寵若驚之餘，我毋忘求位初心，趁機會一邊話自己N年前便在貴校畢業，對學校傳統和理念熟到爛，幾乎即場唱埋校歌以表忠誠；另一邊又大打人情牌，話認識前校長云云。校長聽後既驚訝又高興，事關兩位校長雖然隔咗幾代人，但佢哋竟然互相認識，而且有聯繫！我同校長嘅見面，最後在非常愉快氣氛下結束。
回家向大人匯報，大家認為「有機」，但穩陣計再補臨門一腳，即時call前校長，懇請幫口美言幾句。結果在大約兩星期之後收到面試邀請，面試嗰日，我同老婆都緊張到爆，最怕阿仔一個唔小心錯失黃金機會。之後再過一個禮拜收到入學好消息，不枉當時日日只瞓幾粒鐘便早上去學校「返工」的付出。
誠意搭夠打動校長開方便之門
總結叩門之旅，我最大感受係千祈唔好睇小「誠意」呢兩個字嘅威力。到阿仔正式入學之後有更多機會同校長傾偈，校長講番之所以爽快答應我「傾兩句」嘅要求，同埋請我到校長室詳談，係畀我幾個早上出現校門前嘅誠意打動，如果無呢次見面，即使點樣似熟賣熟打人情牌都係冇用。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
