Eric爸爸個人比較感性，畢業季節一到，好容易傷春悲秋，今次想同大家分享嘅幾年前大仔幼稚園畢業，最後一次家長日嘅事。
見家長預咗要「拆彈」
家長日對我嚟講係「拆彈日」，以往都係聽老師講個仔喺學校幾跩，我作為家長又點應對同改善。老師形容大仔好似一般活潑男仔，係一個幾醒目又多嘢講嘅口水佬，試過同同學仔嗌交，但又無「出手」，平時鍾意玩多過學習，一直以來讀書成績唔錯。不過我試過去觀課，發現佢成堂同好朋友不停傾偈，食茶點或者去玩又第一個衝出嚟，反而呢一點令我幾頭痕，好怕佢騷擾其他同學仔上堂。
今次最後一次見家長，諗住輕輕鬆鬆，點知老師見到我，第一句就話：「囝囝下學期好大進步，見住佢真係有成長，所以佢攞品學兼優係實至名歸，呢點亦係我作為老師最感動嘅地方⋯⋯」我簡直唔敢相信阿仔竟然攞獎，而更令我估唔到嘅係，老師開始喊！
老師感動見證學生成長
老師講返，以前阿仔係心急仔，又鍾意駁嘴拗頸型，你叫佢同人分享，佢會問點解，咁我玩呢件玩具嘅時間咪少咗！但下學期觀察到阿仔變得成熟，仍然成日問點解，但真心想知背後原因；佢有好多朋友，但開始識得鼓勵同學再嘗試，當好朋友攞獎，阿仔會大力拍掌，由衷地替朋友高興。而學校畢業劇演出，老師亦睇到佢由綵排開始，一次比一次有進步，原來佢有用心記住老師嘅提醒。聽到呢度，我都忍唔住喊。
家長常著眼子女不足
突然咁感觸，係因為家長喺子女成長路上，好多時會著眼佢有咩唔好。「你識A，咁點解你唔識B？呢樣嘢提咗你咁多次，點解你都係做錯？」我感動嘅係，原來老師懂得欣賞每位小朋友，仍然願意畀機會佢，循循善誘一步步幫佢。
我當初揀呢間幼稚園，就係因為有朋友大力推介，老師有愛心！其實讀完三年幼稚園，小朋友識幾多字係咪最重要？反而我想佢成為一個有愛心嘅小朋友，懂得感恩、為人設想，打好呢個根基，先可以茁壯成長。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
