畢業禮物父母諗爆頭

一年一度學校畢業日子又嚟到，幼稚園生、小學生、中學生著起筆直畢業袍喺學校四處打卡，滿面笑容。想當年自己畢業仲係「一嚿飯」，記憶中到中學畢業先識得同同學仔喺校園影影相，寫寫紀念冊，嗰句「萬里長城長又長，我倆友誼比它長」寫到手軟。

成日話時代唔同，而家幼稚園畢業已經要影畢業相，不過最頭痕係預備畢業禮物，我覺得直頭慘過當年諗結婚回禮禮物。畢業禮物要送畀老師，又要送畀同學，要有意思又要實用，我覺得艱難程度足以舉辦一個比賽。

話說幾年前大仔幼稚園畢業，已經要預備一大堆物品，首先畢業花束唔一定係鮮花，可以買公仔、扭汽球花束、鈎織花束。但最估唔到，係要訂造燈牌！因為而家幼稚園好多時會有畢業典禮，小朋友會唱歌、跳舞、表演，各位爸爸媽媽梗係要應援啦，所以印有小朋友名嘅燈牌可以話係必備。

到最恐怖嘅一環，就係畢業禮物！我哋當年都算有心思，花咗好長時間集齊自己小組三十幾個同學加埋老師嘅大頭相加，整咗個相架，好靚！我哋都收到好多好得意嘅禮物，有同學將全班小朋友嘅樣印喺水杯、又有學校書包樣嘅書夾、親手鈎織公仔⋯⋯個個小朋友收到都好開心。
不過我最好奇，究竟老師年年收到一大堆禮物，點樣處理？有老師話真係唔捨得扔，唯有租迷你倉儲存。不過老師又好感觸講一句，其實咩禮物唔重要，最重要小朋友經歷完呢幾年有所得著，小朋友鍾意老師、鍾意返學，就係最大禮物。