真係嬲到震！可以對一個毫無反擊能力嘅BB下毒手，何止喪盡天良，直頭滅絕人性，人神共憤！
小雪兒疑被社區保母虐待至重傷
小雪兒，一個只有9個月大，應該連行路都未學識嘅嬰兒，懷疑受到社區保母虐待，傷勢嚴重至有終身殘廢之虞。而事發地點竟然係專門照顧和保護兒童嘅機構內，真係超級諷刺！
5 歲臨臨被長期虐待致死
小雪兒受虐事件，令我即時想起2018年5 歲女童臨臨被生父和繼母長期虐待致死嘅慘劇。每當我聽到呢類事件，憤怒同無奈就會湧上心頭。小雪兒事件向我哋嘅社會再次發出刺耳嘅警號，提醒我哋社會上每一個人，對於兒童嘅保護不能有絲毫嘅鬆懈，即使你覺得某些人或某些機構可以信賴，但不要以為交託他人便可以完全放手不理，應該要時刻有警惕之心。
大人天職保護孩子
作為一個兩個孩子父親，我深知為家長嘅責任有幾重大，同時真心覺得保護孩子，其實唔只係為人父母嘅責任，應該係所有大人嘅天職，點解我哋會高大過佢哋，強壯過佢哋，就係要嚟保護小孩，等佢哋在免受傷害情况下健康和快樂成長。
挺身舉報免小童受二次傷害
所以，我呼籲所有家長或成年人，除咗關注自己嘅子女或親朋，也應該對社會上所有嘅兒童負責，尤其是主力照顧小孩福祉的專業人士，例如社福機構職員、幼兒教育工作者等。當我哋見到或知道發生虐兒事件嘅時候，即使覺得無力出手相助，最低限度也要勇於舉報，如果選擇視而不見，等同做咗施虐者嘅幫兇。每一個知情不報嘅行為，都係對於兒童嘅二次傷害。
我哋唔能夠容忍任何形式嘅虐兒行為，也唔能夠容忍任何形式嘅冷漠、漠視。每個人都有責任保護兒童，如果你懷疑有虐兒事件發生，除咗報警之外，都有其他途徑可以舉報，例如透過社會福利署嘅熱線匿名舉報(2343 2255)，唔少NGO都提供相關服務，例如防止虐待兒童會也有熱線(2755 1122)供舉報同埋提供支援服務。記住，只係出句聲，可能就會挽救一條小生命！
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
