內容目錄
最近嘅全城熱話，非廖孖記莫屬。估唔到一宗腐乳含菌量超標事件，會演變成一個百年品牌落幕。成件事最令我痛心嘅係，一個歷史悠久嘅香港品牌並非香港製造，一年前接受訪問，後人仲捧出一大盆黃豆，講解佢哋選用加拿大黃頭、只會揀選中層生腐乳⋯⋯但原來30年前已經從內地工廠攞貨加工，你都咪話，好似畀佢哋欺騙咗感情。
椒絲腐乳通菜由細食到大
腐乳被譽為東方芝士，我細細個無試過腐乳撈飯，但椒絲腐乳通菜就由細食到大，鮮嫩嘅通菜，配合腐乳嘅咸香，再加上微辣嘅椒絲，配合得天衣無縫。到人大咗出去食飯，效外油菜如果有得揀腐乳通菜，就一定會揀佢。
但今次事件揭發，原來香港製造嘅腐乳係絕無僅有。呢件事令我諗起豉油，之前透過傳媒報道得知，悅和醬園面臨政府收地，前路未知如何。但悅和的確係如假包換嘅香港製造，至今仍堅持用傳統方式製作，生產、包裝，如果你試過悅和嘅豉油，你會發現顏色、氣味、味道都係與眾不同。我好多移民嘅朋友，身處異地，用盡方法搵返香港老字號嘅豉油、腐乳、豆豉，食嘅係一份回憶。
移民朋友努力尋味道回憶
呢一刻我望住對仔女，究竟佢哋大個咗，仍然會有邊個香港品牌陪伴佢哋？佢哋大個咗，最掛念嘅回憶中味道，又係啲咩？我哋成日都感慨，好多食物都係細個嘅時候好食，但喺時代洪流之中，我哋究竟有冇努力保留返屬於我哋呢一代嘅嘢，定係為咗價錢而選擇放棄？
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
