近日見到同事、朋友甚至剛認識的人，話題都離唔開香港選手喺奧運嘅表現：世一江旻憓守得雲開見月明、張家朗衛冕金牌無得頂、何詩蓓4面奧運獎牌超勁、乒乓波混雙打入四強創歷史⋯⋯ 奧運潮熱爆，Eric爸爸忍唔住繼續講呢個talk of the town，但唔係關於港隊運動員如何為港爭光，觸發我再講奧運題目嘅係一位公司同事嘅說話。
「一定要學劍擊游水乒乓波」
呢位初為人母嘅同事同我喺公司茶水間傾偈時講：Eric你睇下香港運動員幾勁，第時我個仔一定要學劍擊、游水或乒乓波⋯⋯
呢位同事嘅說話，令我想番起阿仔小學一位家長朋友同我講過，佢個仔好鍾意踢波但唔係踢得特別叻，反而試玩咗一兩次嘅街舞，老師都讚阿仔有天份；加上佢覺得香港地踢波無前途，點踢都唔會有出息，於是唔准佢學踢波，只集中學街舞，仲一個星期學三日，全力催谷！
天份和興趣必須平衡
Eric爸爸雖然唔贊成讀死書，多做運動肯定有益身體健康，但都應該要喺天份和興趣之間平衡一下。即使在某項運動表現出天份，但如果唔係小朋友真心感興趣，強制參加，佢哋可能只會敷衍了事，到頭來都未必有好表現。大家有冇聽過有家長強迫小朋友學小提琴嘅故事，小朋友不情不願參加，最終考獲英國皇家音樂學院嘅八級試之後，回家將小提琴打個稀巴爛！你哋希望睇到咁嘅結果咩？
有興趣加倍投入事半工倍
相反，鍾意嘅項目，小朋友必定加倍用心和投入，事半工倍，即使最終無特別成就，起碼賺咗「快樂時間」。有冇睇到代表盧森堡打奧運乒兵女單賽嘅61歲華裔球手，對戰中國一姐嗰場比賽，一個享受比賽打快樂乒乓，一個眉頭緊鎖唧都唔笑，你哋想你小朋友做邊個？
做運動應該係身和心都要得益，心理健康和身體健康一樣好重要。從來都係嗰句，勉強無幸福！
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
