暑假一開始，好多家庭即刻衝去機場旅行，十足動漫展一樣。Eric爸爸當然唔例外，見泰國機票平，於是揀咗清邁，以為喺酒店游水曬太陽hea下，但出乎意料有驚喜。呢度除咗有飛索、越野車、水上樂園，仲有一個特別節目——大象體驗營。
惡劣環境營救大象
一大朝早，體驗營工作人員就嚟到酒店，接載我哋到清邁山區，一小時後終於到達。今次我哋要照顧一家四口，爸爸已經50歲，但小象只有5個月大，講解員話呢度啲大象都係從惡劣環境中救出來。
我哋第一個任務就係餵大象，工作人員會提供裝滿香蕉、蔗嘅籃。香蕉都無剝皮，只要你伸出手，大象就會運用靈活鼻子，迅速捲走香蕉，放入口食。大象小象都非常心急想食更多，每當濕潤象鼻碰到小朋友的小手，他們都呱呱大叫，非常可愛。而5個月大小象非常頑皮，穿插人群之中撞來撞去，令到班小朋友特別開心，又笑又叫。
泥漿保護大象皮膚
本來我哋要同大象進行泥漿浴，同埋喺河流幫大象沖涼。但由於前一晚落大雨，令河流水位上漲，水流急湍，所以唔可以進行。象嘅皮膚非常粗糙，表面仲有一條條豎起嘅毛髮，聽工作人員講，因為大象皮膚比較敏感，容易生皮膚病，所以會將泥巴塗抹喺大象身上，就好似幫大象敷mask保護皮膚。
最後一個行程就係做飯糰畀大象食，主材料有香蕉、米、羅望子等。據講呢啲係大象嘅維他命，可以補充一般食物缺少嘅營養，同埋有助排便。小朋友將所有材料搓成大大粒嘅飯糰，真係要花啲力氣，今次要直接餵入大象口中，非常新奇好玩。
保育旅遊才是大勢所趨
今次體驗營畀大人小朋友了解到大象生活習性，回程時大家都好攰，但小朋友都話好開心，可以幫手照顧大象。但我地回程途中見到一個地方，有遊客騎大象、同埋坐牛拉車，小朋友即刻好緊張話咁做唔啱。
其實唔需要騎大象、叫大象表演雜技，保育大自然先係大勢所趨，希望當地人會發展更多保育園區，教導大人小朋友保護動物。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
