呢排成日落雨，搞到個人無乜心機，周末活動都係行吓商場食吓嘢，難得阿仔同學推介有個創科展，於是我同屋企人星期日去咗會展睇第三屆創科展，去完感覺驚為天人！
內容目錄
中小學生創新發明 以人為本
原先以為同仔女入去做實驗，玩完動力沙、抗氧化劑都覺得幾得意，但好戲在後頭，現場有120個中小學攤位，展示佢哋小發明，由評委選出三甲。
唔好睇佢哋年紀輕輕，有啲甚至係初小學生，可以創作各式各樣發明，最意外係所有嘢背後都想幫人！好似有小朋友某次去食壽司，留意到埋單時店員手持一個感應器掃一掃啲碟，就知道客人食咗幾多隻紅色碟、金色碟，引伸到佢同學校團隊諗到，不如用同一原理幫老師掃功課，咁唔使逐本作業睇就知道邊個同學有交功課；又例如愈來愈多女性患上乳癌，有同學認為人手檢查其實幾主觀，就發明一個儀器檢查乳部有無硬塊，希望取代人手檢查；仲有仲有，大家細個一定玩過夜光星星，貼滿天花板，但吸光後好快無光，有同學就將夜光劑效果延長至24小時，應用喺電筒、燈，咁就唔怕無電。
參賽同學獲鼓勵增自信
呢啲發明只係冰山一角，我同一啲同學傾偈，講開我細個一嚿飯咁，所謂的創科，最叻就係砌過電路板，真係好佩服佢哋創意！點知有同學仔突然眼濕濕，有啲感觸話：「呢個比賽有好多名校入圍，無諗過我哋可以入圍同場比賽。始終我哋Band 3出身，都會覺得發明唔夠人哋勁，英文又唔好，會有自卑。但好多人睇咗我哋發明大讚我哋，令我哋有返自信！」
比賽結果揭盅，三甲唔係名校獨尊。我都好感觸，近年面對身邊親友移民，但行完今次展覽，感覺學術唔係唯一出路，香港仍然好有希望。金獎得主仲可以去瑞士參加國際盛事「日內瓦國際發明展」，上屆有香港隊伍仲攞埋獎，希望今屆再接再勵，畀人見識香港人大細都咁勁揪！
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
