最近媽媽谷熱烈討論邊個牌子嘅快速測試劑最準，基本上有小朋友嘅屋企，都會有五合一、六合一測試劑，原來最新出到八合一，包括新型冠狀病毒、甲型流感、乙型流感、合胞病毒、腺病毒 、肺炎支原體、副流感病毒1/3型、副流感病毒2型⋯⋯大家唔好覺得好誇張，基本上媽媽谷每日都有人報告小朋友中咗邊隻病毒，加上最近有幾宗兒童流感死亡個案，有個只係6歲人仔，身體一向健康，病情幾日內急轉直下，睇到好心痛。
內容目錄
人人屋企都囤積快速測試劑
相信家長們囤積唔少快速測試劑，好多仲會入定幾個牌子，咁唔知大家有幾相信快測結果？某日有位媽媽喺媽媽谷問邊個兒科醫生好，原來快測顯示個仔中咗腺病毒，咁佢上網搵資料，知道腺病毒可以高燒一星期，但到第8日都繼續燒。媽媽們就勸呢位媽媽盡快睇醫生，呢位媽媽即刻去醫院急症室，醫生推斷阿仔個肺花咗，所以要即刻入院。化驗報告顯示阿仔係中咗腺病毒，但原來再中埋肺炎支原體，個肺花晒，要住院食抗生素。
有發燒都係睇醫生最穩陣
呢位媽媽事後分享，苦口婆心咁勸家長們，如果小朋友發燒，穩陣啲去睇醫生，佢當初就係俾腺病毒會燒好多日誤導咗。其實我之前睇醫生，醫生都有講，媽媽們嚟睇醫生，最鍾意講最近有個同學有咩病，我小朋友係咪都中？又或者自己屋企快測中咗咩病。醫生話只會用作參考，始終唔知大家檢測方法同程序，醫生主要睇返病徵推斷。而家病毒咁惡，有時你唔只中一種病毒，加上併發症，例如肺炎、腦炎，隨時死人。所以作為負責任家長，真係要時刻觀察仔女，及時睇醫生，保障小朋友健康。
Eric爸爸
80後Eric，兩孩爸爸，被譽為「神隊友」，最鍾意同大家交流仔女經。
