最近不停捱夜，不過唔係為工作，而係忙於睇歐國盃，睇到熊貓眼不特止，仲上晒火，牙肉又紅又腫，真係牙痛咁聲，好彩老婆大人煲幾劑廿四味好使得，兩日就無晒事。
唔舒服嗰幾日，公司同事K姐見我無喱心機，傾開知我牙痛，但無睇牙醫或醫生好快就無事，當正我係專家，就問我意見。
牙仔鬆脫 牙肉紅又腫
話說佢個6歲囡囡呢排下顎左邊門牙搖搖欲墜，周邊牙肉又紅又腫，食嘢時好唔舒服仲有啲痛，搞到個人煩躁不安，瞓都瞓得唔好。跟住佢就畀我睇咗條網片，片中小女孩又係門牙搖搖下，佢屋企人搵咗支玩具槍畀佢，用條繩一頭綁住佢隻牙，另一頭綁住槍管粒子彈，起初小女孩個樣好驚喊晒口，最終在旁邊人鼓勵下自己扳發射掣，牙仔𠽌一聲跟粒子彈飛咗出去，小女孩忽然發覺隻牙已經甩咗，表情登時變得好興奮！
玩具槍剝牙法/老夫子古法
K姐覺得呢個方法唔錯，問我照辦煑碗好唔好，又話一係用差唔多原理嘅「老夫子剝牙古法」，條繩另一端由綁住粒子彈改為房門手柄，一拉開道門就扯隻牙出嚟！佢認為兩個方法都可以試，最重要係又快搞掂又慳錢！
牙醫：傷口有感染風險
我聽完之後直覺覺得唔係好妥，轉頭幫佢問咗做牙醫嘅朋友嘅意見，朋友就話兩種方法都有風險！佢話5-7歲小朋友一般開始換牙，乳齒剝落、恆齒長出是正常發育現象，過程中乳齒會慢慢被迫走，因此會出現鬆脫情况，脫落過程快慢因人而異，而自己剝牙方法嘅風險，除咗涉及衛生問題，傷口有可能會感染細菌，過程中仲有可能嚇親小朋友，見到自己個口流血就更驚嚇，處理唔好可能留下心理陰影。仲有一個係timing問題，過早或過遲剝牙，都有可能影響日後牙齒排列嘅整齊程度，何謂早和遲，最好由專業人士決定，而順其自然甩出嚟應該係最佳方法。
每日自己搖牙當玩遊戲
牙醫朋友建議，小朋友換牙期間如果有唔舒服，例如痛、腫等情况影響到日常生活，應該要睇牙醫跟進，檢查後先至確定係咪要剝牙。但如果冇痛或腫，只係牙仔鬆咗覺得有啲唔自在，佢建議可以試下當同小朋友玩遊戲咁，每日輕輕力自己搖下隻牙，持續一至兩個月，乳齒一般都可以順利剝落。如果唔得，到時先至再睇牙醫，再決定處理方法。
我聽完之後轉告K姐，佢即刻打消晒自己剝牙嘅念頭，仲急急book咗牙醫appointment 。計我話乜嘢事都好，千祈唔好以為上網睇下就變專家，做錯決定隨時影響健康和嚇親小朋友，咪制！
Eric爸爸
80後兩孩爸爸，被譽為「神隊友」，最鍾意同大家交流仔女經。
